काठमाडौँ : नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले आफू इतिहासमा खलनायकका रूपमा स्थापित हुन नचाहेको बताएका छन् । आइतबार सार्वजनिक गरिएको भिडियो सन्देश मार्फत उनले देशलाई “सही दिशामा नपु¥याएसम्म विश्राम नलिने” दृढता व्यक्त गरेका हुन्।
भिडियो सन्देशमा उनले हलिउडको चर्चित संवाद उद्धृत गर्दै भने, “या त तिमी नायकको रूपमा मर, या त आफूलाई खलनायक बनेको हेर्न जीवित रहू।” उनले थपे, यदि आफू धेरै पहिले राजनीतिक जीवनबाट अलग भएको भए सायद देशले उनलाई नायककै रूपमा सम्झिने थियो, तर आफू अहिले पनि सक्रिय रहनुको कारण देशलाई सही बाटोमा डोर्याउने दायित्व भएको दाबी गरे।
“म खलनायक बनेर इतिहासको पानामा हराउन चाहन्नँ। देशलाई सही दिशामा नपु¥याएसम्म विश्राम लिने छैन,” उनले सन्देशमा भनेका छन्। साथै, जनताले आफूलाई जुन दृष्टिकोणले मूल्याङ्कन गरे पनि त्यो उनीहरूको अधिकार भएको उल्लेख गर्दै उनले भविष्यमा गरिने परिवर्तनहरूले आफ्नो उपस्थितिको अनुभूति दिलाउने विश्वास व्यक्त गरे। प्रचण्डले आफू नयाँ विचार र नयाँ पुस्ताका लागि सधैं खुला रहेको बताएका छन्। तर, डिजिटल युगमा सामाजिक सञ्जालमार्फत फैलिने भ्रम र भ्रामक प्रचारप्रति सचेत रहन आग्रह गरे।
“हरेक चम्किलो चिज हिरा हुँदैन,” उनले भने, “म यहाँ भोट माग्न आएको होइन, स्वतन्त्र चिन्तनका लागि अपील गर्न आएको हुँ।”उनले हाल युवापुस्ताले उठाइरहेका भ्रष्टाचार अन्त्य, पारदर्शिता र बलियो सरकारजस्ता मुद्दा आफूले जनयुद्धकालदेखि नै उठाउँदै आएको एजेन्डा भएको बताए। राजनीतिक स्थिरता र विकासका लागि प्रत्यक्ष निर्वाचित कार्यकारी प्रमुखको व्यवस्था आवश्यक रहेको आफ्नो पुरानो धारणा पुनः दोहोर्याउँदै उनले वर्तमान संसदीय प्रणालीलाई “कुर्सीको तानातान” को खेलको संज्ञा दिए।
“मेरो माग र तपाईंहरूको माग एउटै हो। म तपाईंहरूकै पुस्ताको सोच बोकेर हिँडेको यात्री हुँ,” उनले भने । प्रचण्डको यो सन्देशले पछिल्लो समय राजनीतिक भूमिकाबारे उठिरहेका प्रश्नहरूबीच उनले आफ्नो प्रतिबद्धता र दृष्टिकोण पुनः स्पष्ट पार्ने प्रयासका रूपमा हेरिएको छ।
व्यक्तिगत अनुभव थियो – भारतका साहसी रक्षकहरूको दर्शनबाट “धन्य” महसुस गर्न “बिहान सबेरै” भ्रमण गर्नुभएको थियो।
