ईरानमा जारी आर्थिक आन्दोलनका बीच महिलाहरूका केही तस्बिर र भिडियोहरू सार्वजनिक भएका छन्, जसले विश्वको ध्यान खिचेको छ। सडकमा नारा, आगजनी र झडपबीच ईरानी महिलाहरूले सर्वोच्च नेता आयातुल्लाह अली खामेनेईको तस्वीर जलाएर त्यसैबाट सिगरेट सल्काइरहेका देखिन्छन्। महिलाहरूको यो विरोध शैली सत्ता र सामाजिक बन्धन दुवैलाई एकसाथ अस्वीकार गर्ने सशक्त सन्देश बनेको छ।
यो विरोध त्यस्तो समयमा देखिएको हो, जब देश आर्थिक सङ्कट, महँगी र बेरोजगारीका कारण चरम असन्तोषमा छ। सुरुमा यी प्रदर्शनहरू आर्थिक मागसम्म सीमित थिए, तर अहिले यसको स्वर पूरै व्यवस्थाविरुद्ध केन्द्रित हुँदै गएको छ। सडकमा उत्रिएका मानिसहरू अब सुधारको माग मात्र होइन, इस्लामिक रिपब्लिक नै अस्वीकार गर्ने कुरा गर्न थालेका छन्। महिलाहरूको यो आन्दोलनलाई तीन वर्षअघि महसा अमिनीको मृत्युपछि सुरु भएको हिजाबविरोधी आन्दोलनसँग पनि जोडेर हेरिँदैछ।
विशेषज्ञहरूका अनुसार यहाँ सिगरेट केवल धूम्रपानको साधन होइन, विरोधको प्रतीक हो। महिलाहरूका लागि धूम्रपान लामो समयदेखि सामाजिक र कानुनी रूपमा निरुत्साहित गरिँदै आएको छ। यस्तो अवस्थामा सार्वजनिक रूपमा सिगरेट सल्काउनु, त्यो पनि सत्ताको सबैभन्दा शक्तिशाली अनुहारको तस्वीरबाट—यो दोहोरो विद्रोहको संकेत हो। एकातिर राजनीतिक सत्ताविरुद्धको चुनौती छ भने अर्कोतर्फ सामाजिक नियन्त्रणलाई ठाडै अस्वीकार गरिएको छ।
ईरानी कानुनअनुसार सर्वोच्च नेताको तस्वीर जलाउनु गम्भीर अपराध मानिन्छ। त्यसका बाबजुद पनि यस्ता भिडियोहरू खुला रूपमा बाहिर आउनु डरको पर्खाल कमजोर हुँदै गएको संकेत हो। प्रशासनले आन्दोलन दबाउन कडाइ बढाएको छ, इन्टरनेट नियन्त्रण कडा बनाइएको छ र चेतावनीहरू दिइएका छन्। तर प्रतीकात्मक विरोधलाई पूर्ण रूपमा रोक्न सजिलो देखिँदैन। चिकित्सकहरू र स्थानीय बासिन्दाहरूका अनुसार हिंसामा ठूलो संख्यामा मानिसहरूको ज्यान गएको छ, तर सडकमा उत्रिनेहरूको संख्या घटेको छैन।
सामाजिक सञ्जालमा भाइरल भएको एक भिडियोमा फैसल करीम मसूदले उस्मान हादीको हत्यासँग आफ्नो कुनै सम्बन्ध नरहेको दाबी गरेका छन्। उनका अनुसार, हादीसँग उनको सम्बन्ध केवल व्यावसायिक मात्र थियो। फैसलले सरकारी ठेक्का पाउने आशामा हादीलाई राजनीतिक चन्दा (डोनेसन) दिएको स्वीकार गरे पनि हत्या प्रकरणसँग आफू असम्बन्धित रहेको बताएका छन्।
