आर्थिकद्वार/ Desk 
पुरै देशलाई आन्दोलित बनाएको बंगलादेशको हत्या प्रकरणले नया मोड लिएको छ । उस्मान हादी हत्या प्रकरणका मुख्य आरोपित फैसल करीम मसूदले अन्ततः आफ्नो मौन तोडेका छन्। ढाका प्रहरीले फैसल हत्या पश्चात भारत (मेघालय) भागेको दाबी गर्दै आएको थियो। तर हाल सार्वजनिक भएको एक भिडियोमा फैसलले आफू दुबईमा रहेको दाबी गरेका छन्।
आरोपित फैसलले उस्मान हादीको हत्यामा आफ्नो कुनै संलग्नता नरहेको स्पष्ट रूपमा अस्वीकार गरेका छन् र सम्पूर्ण आरोप जमात–ए–इस्लामी माथि थोपरेका छन्। यस खुलासाले बंगलादेश प्रहरीद्वारा गरिएका ती दाबीहरूमा गम्भीर प्रश्न उठाएको छ, जसलाई यसअघि नै भारतीय सीमा सुरक्षा बल (बीएसएफ) ले खारेज गरिसकेको थियो।
आरोपितको दाबी : ‘म निर्दोष छु’
सामाजिक सञ्जालमा भाइरल भएको एक भिडियोमा फैसल करीम मसूदले उस्मान हादीको हत्यासँग आफ्नो कुनै सम्बन्ध नरहेको दाबी गरेका छन्। उनका अनुसार, हादीसँग उनको सम्बन्ध केवल व्यावसायिक मात्र थियो। फैसलले सरकारी ठेक्का पाउने आशामा हादीलाई राजनीतिक चन्दा (डोनेसन) दिएको स्वीकार गरे पनि हत्या प्रकरणसँग आफू असम्बन्धित रहेको बताएका छन्।
उनले हादीको हत्याको पछाडि ‘जमात–शिबिर’ समूहको हात हुनसक्ने आरोप लगाउँदै आफू र आफ्नो परिवारलाई योजनाबद्ध रूपमा फसाइँदै आएको दाबी गरेका छन्।
दुबईमा रहेको प्रमाण
मिडिया रिपोर्टहरूका अनुसार, फैसल दुबईमै रहेको पुष्टि गर्ने केही कागजातहरू फेला परेका छन्। फैसलसँग सन् २०२२ मा जारी भएको संयुक्त अरब इमिरेट्स (यूएई) को पाँच वर्षे मल्टिपल–एन्ट्री टुरिस्ट भिसा रहेको छ। उपलब्ध अभिलेखले उनी हाल पनि दुबईमै रहेको देखाउँछन्, जसले ढाका प्रहरीले अघि सारेको ‘भारत भागेको’ सिद्धान्तलाई गलत सावित गरेको छ।
ढाका प्रहरी बनाम बीएसएफ : सीमा पार गरेको दाबीमा विवाद
ढाका प्रहरीका वरिष्ठ अधिकारी एस.एन. नजरुल इस्लामले डिसेम्बर १२ मा भएको आक्रमणपछि फैसल र अर्का एक संदिग्ध आलमगीर शेख हलुआघाट सीमा नाका हुँदै भारतको मेघालय प्रवेश गरेको दाबी गरेका थिए। प्रहरीका अनुसार, दुई जना भारतीय नागरिकले उनीहरूलाई रिसिभ गरेका थिए।
तर, मेघालयस्थित भारतीय सीमा सुरक्षा बल (बीएसएफ) का महानिरीक्षक ओ.पी. उपाध्यायले यी दाबीहरूलाई पूर्ण रूपमा अस्वीकार गरेका छन्। उनले अन्तर्राष्ट्रिय सीमा पार गरिएको कुनै प्रमाण नपाइएको र त्यस किसिमको कुनै गतिविधिको रिपोर्ट समेत नरहेको स्पष्ट पारेका छन्।